दादर हे मुंबई शहरातील मध्यवर्ती आणि सांस्कृतिकदृष्ट्या महत्त्वाचे केंद्र आहे. दादर येथे १९४० साली औंध संस्थानच्या राजेसाहेबांच्या (नाव) अध्यक्षतेखाली पहिली कीर्तन परिषद आयोजित करण्यात आली होती. देशभरातील नामवंत व सुप्रसिद्ध कीर्तनकार या परिषदेला उपस्थित होते. या परिषदेच्या समारोपानंतर कै. शंकरराव कुलकर्णी व कै. गोविंदराव भोसेकर यांनी पुढाकार घेऊन अखिल भारतीय कीर्तन संस्थेची स्थापना केली. नारदीय कीर्तनाचे शास्त्रशुद्ध प्रशिक्षण देऊन नवीन कीर्तनकार तयार करण्यासाठी १९४० साली श्रावण वद्य पंचमीला ही संस्था स्थापन झाली. कै. पार्वतीबाई लिमये यांनी भाडेतत्त्वावर उपलब्ध करून दिलेल्या पत्र्याच्या शेडमध्ये पांडुरंगाचे मंदिर स्थापन करून कीर्तन प्रशिक्षणाची मूहुर्तमेढ रोवण्यात आली. मुंबईत अथकपणे गेली ८० हून अधिक वर्षे कीर्तन प्रशिक्षणाचे वर्ग चालवणारी, ही अत्यंत महत्त्वाची संस्था आहे. बाल, युवा व महिला कीर्तन महोत्सव हे संस्थच्या उपक्रमांपैकी महत्त्वाचे उपक्रम. त्याचप्रमाणे विठ्ठल मंदिरात अनेक धार्मिक कार्यक्रम सुद्धा संपन्न होतात. कीर्तन प्रशिक्षणासह अनेक नैमित्तिक कार्यक्रम, बाल संस्कार शिबिरे असे कार्यक्रम या वास्तूत आयोजित केले जातात.