संस्थेच्या स्थापनेला ८० हून अधिक वर्षे पूर्ण झाली आहेत. पत्र्याच्या शेडमध्ये स्थापन झालेल्या विठ्ठल मंदिरात सुरू झालेल्या संस्थेची प्रगती वेळोवेळी होत गेली व आज एका दुमजली सुसज्ज इमारतीत तिचे रुपांतर झाले आहे. १९६० साली संस्था भाड्याने वापरत असलेला जागा विकत घेऊन तेथे इमारत बांधण्यात आली. पुढे १९६९ साली कामाचा दुसऱ्या मजल्यावर एक सभागृह बांधण्यात आले. आज संस्थेची तीन मजली इमारत दिमाखात उभी आहे. संस्थेच्या तळमजल्यावर श्रीविठ्ठलाचे मंदिर आहे. पहिल्या मजल्यावर सुसज्ज धार्मिक ग्रंथालय व कीर्तन प्रशिक्षण वर्ग, दुसऱ्या मजल्यावर कै. कमलाबाई जोशी सभागृह आणि तिसऱ्या मजल्यावर मंगल कार्याच्या व्यवस्थेच्या दृष्टीने राखीव खोल्या व किचन हे संस्थेच्या सध्याच्या वास्तूचे स्वरुप आहे. कीर्तन अभ्यासक्रमासह भजन, सुगमसंगीत व पौरोहित्य याचेही प्रशिक्षणवर्ग दरम्यानच्या काळात सुरू झाले. सन २००० साली संस्थेच्या वास्तूचे पुनर्निर्माण झाले. सन २००१ मध्ये कीर्तन विद्यालयाचे नामकरण ” साई सत्चरीत्रकार हेमाडपंत कीर्तन विद्यालय ” असे करण्यात आले.