देवर्षी नारद हे आद्य कीर्तनकार मानले जातात. महाराष्ट्रातील नारदीय कीर्तन परंपरा ही थेट महानुभाव संप्रदायाच्या काळापासून सुरू असल्याचे पुरावे मिळतात. वारकरी संप्रदायाने देखील महाराष्ट्राच्या कीर्तन परंपरेत मोलाचे योगदान दिले आहे. संत नामदेव हे वारकरी संप्रदायातील आद्य कीर्तनकार म्हणून ओळखले जातात. पुढे अनेक संतांनी कीर्तनातून समाजप्रबोधनाचे आणि ज्ञानप्रसाराचे कार्य सुरू ठेवले. हाच वसा ‘अखिल भारतीय कीर्तन संस्था’ आपल्या कीर्तन महाविद्यालयाच्या माध्यमातून पुढे नेत आहे. ८० हून अधिक वर्षे कीर्तन प्रशिक्षणाचे कार्य नियमितपणे सुरू आहे. दरवर्षी ताज्या दमाचे कीर्तनकार या संस्थेतून प्रशिक्षित होऊन बाहेर पडतात. कीर्तनकार तयार करणे हे संस्थेचे प्रमुख उद्दिष्ट असल्यामुळे कीर्तन विद्यालयात दिले जाणारे कीर्तन प्रशिक्षण हा या संस्थेच्या कार्याचा कणाच आहे. मुंबईसारख्या महानगरात अद्यापही अखिल भारतीय कीर्तन संस्था हीच एकमेव कीर्तन प्रशिक्षण देणारी संस्था असल्यामुळे या संस्थेतून अलंकृत होणाऱ्या विद्यार्थ्यांना कीर्तनसेवेसाठी विशेष मागणी असते. दूरस्थ पद्धतीनेही हे प्रशिक्षण घेण्याची सोय संस्थेने उपलब्ध करून दिली आहे.